Num 11 | NdeIBE | STEP | Abantu basola ngobunzima ababelabo uJehova esizwa, kwathi ekuzwa lokho wathukuthela kakhulu. Kwasekusithi umlilo ovela kuJehova wavutha phakathi kwabo waze waqothula lezinye izindawo ezisemaphethelweni ezihonqo.

Numbers 11

Umlilo ovela kuJehova

1 Abantu basola ngobunzima ababelabo uJehova esizwa, kwathi ekuzwa lokho wathukuthela kakhulu. Kwasekusithi umlilo ovela kuJehova wavutha phakathi kwabo waze waqothula lezinye izindawo ezisemaphethelweni ezihonqo. 2 Kwathi lapho abantu sebekhale kuMosi, yena wakhuleka kuJehova ngakho umlilo wadeda.

3 Indawo leyo yasibizwa ngokuthi yiThabhera, ngoba umlilo kaJehova wavutha phakathi kwabo.

Izigcwaca ezivela kuJehova

4 Ududu lwabantu olwaluphakathi kwabo lwaqala ukufisa okunye njalo ukudla, ngakho labako-Israyeli baqala ukulila bathi, “Aluba besingazuza inyama yokudla nje kodwa lokhu!

5 Sesikhumbula izinhlanzi esasizidla eGibhithe kungelambadalo lamakhomane, amakhabe, amalikhi lemihlobo yonke yehanyanisi kanye legalikhi. 6 Pho khathesi lapha sesize singasakhwabithi lokudla; kasiboni lutho ngaphandle kwemana yonale zwi!”

7 Imana yayiphose ilingane lentanga yekhoriyanda ilombala ofana lowenhlaka.

8 Abantu babephuma bayeyibutha, bayichole kumbe bayigige. Babeyipheka embizeni kumbe benze amaqebelengwana ngayo. Yayinambitheka njengento ephekwe ngamafutha e-oliva. 9 Kwakusithi nxa kusiba lamazolo ezihonqweni ebusuku, imana layo yayikhithika.

10 UMosi wezwa abantu bedlu inye ngayinye bekhala, ngulowo esemnyango wethente lakhe. UJehova wathukuthela kakhulu, njalo uMosi wakhathazeka. UMosi wathi kuJehova,

11 “Kungani wehlisele ubunzima encekwini yakho na? Kuyini engikwenzileyo okungakuthokozisanga ukuze ungisindise ngobunzima babantu bonke laba na?

12 Ngingunina wabo na? Yimi engabazalayo yini? Kungani usithi ngibaphathe ngezandla zami njengomongikazi ephethe usane, ngibase elizweni lesithembiso owafunga ngalo kubokhokho babo na? 13 Ngingayithatha ngaphi inyama yokupha abantu bonke laba? Lokhu bengikhalela besithi, ‘Sinike inyama sidle!’

14 Ngeke ngibathwale abantu bonke laba ngingedwa; umthwalo lo unzima kakhulu kimi.

15 Nxa kuyiyo indlela ozangiphatha ngayo, ngibulala khathesi – aluba ngifumane umusa kuwe – ukuze ngingaboni ukuhlupheka kwami.”

16 UJehova wathi kuMosi: “Ngilethela ebadaleni bako-Israyeli abangamatshumi ayisikhombisa obaziyo ukuthi bangabakhokheli futhi yizikhulu zabantu. Balethe eThenteni lokuHlanganela ukuze bame lawe khonapho.

17 Ngizakwehla ngizekhuluma lawe khonapho, ngizathatha ingxenye yoMoya okuwe ngiwufake uMoya lowo phezu kwabo. Bazakuncedisa ukuthwala umthwalo wabantu bako-Israyeli ukuze ungawuthwali wedwa.

18 “Tshela abantu uthi: ‘Zingcweliseni lilungiselela usuku lwakusasa, lapho esizakudla khona inyama. UJehova ulizwile likhala kuye lisithi, “Ngubani ozasipha inyama ukuba sidle? Kwakungcono kithi siseGibhithe!” Khathesi uJehova uzalinika inyama, njalo lizayidla.

19 Aliyikuyidla okosuku olulodwa loba ezimbili, loba ezinhlanu, ezilitshumi loba ezingamatshumi amabili, 20 kodwa lizayidla okwenyanga yonke – ize iphume ngamakhala enu, ilitshiphele, ngoba limhlamukele uJehova, ephakathi kwenu, njalo likhalile phambi kwakhe, lisithi, “Kanti sivele sasukelani eGibhithe.” ’ ”

21 Kodwa uMosi wathi, “Mina ngilapha phakathi kwamadoda azi 600,000 ahamba ngezinyawo, kodwa wena uthi, ‘Ngizabanika inyama abazayidla okwenyanga yonke!’

22 Bebengeneliswa na aluba bebehlatshelwe imihlambi yezimvu leyezifuyo? Babezakweneliswa na aluba begolelwe izinhlanzi zonke zasolwandle?”

23 UJehova wamphendula uMosi wathi, “Kambe ingalo kaJehova imfitshane na? Uzabona-ke khathesi longabe yebo loba hayi ukuthi engikutshoyo kuzagcwaliseka kuwe.”

24 Ngakho uMosi waphuma wayatshela abantu lokho okwakutshiwo nguJehova. Wahlanganisa abadala abangamatshumi ayisikhombisa wabamisa bahonqolezela ithente. 25 Ngalokho uJehova wehla ngeyezi wakhuluma laye, yena wasethatha uMoya owawuphezu kwakhe wawethula uMoya phezu kwalabo abangamatshumi ayisikhombisa. Kwathi uMoya usuphezu kwabo, baphrofetha, kodwa kabazange baphinde bakwenze muva kwalokho.

26 Kodwa-ke, kwakukhona amadoda amabili, kungu-Elidadi loMedadi ababesele esihonqweni. Lanxa babebalelwa ebadaleni, kodwa kabazange baphume ukuya eThenteni. Kanti-ke uMoya wawehlele phezu kwabo labo, njalo babephrofetha besesihonqweni. 27 Ijahana elincinyane lagijima layabikela uMosi lathi, “UElidadi loMedadi bayaphrofetha besesihonqweni.”

28 UJoshuwa indodana kaNuni, owayekade engumsekeli kaMosi kusukela ebutsheni bakhe, waphakamisa ilizwi wathi, “Mosi, nkosi yami, bathulise!”

29 Kodwa uMosi waphendula wathi, “Uyangikhwelezela na? Ngiyafisa ukuthi ngabe bonke abantu bakaJehova bangabaphrofethi njalo lokuthi uJehova wehlisele uMoya wakhe phezu kwabo!”

30 Ngakho uMosi labadala bako-Israyeli babuyela ezihonqweni.

31 Kwasekuphephetha umoya uvela kuJehova wathinta izagcwaca zivela olwandle. Zakhithika zelekana ukusuka phansi okwezingalo ezimbili ezihonqweni, zendlaleka okommango ongahanjwa okosuku lonke nxa zonke. 32 Mhlalokho emini lebusuku njalo langosuku olulandelayo abantu baphuma bayabutha izagwaca. Akekho owabutha izagwaca ezinganeno kwamahomeri alitshumi. Ngakho basebezichaya ndawana zonke ezihonqweni. 33 Kodwa kwathi belokhu besayihlafuna inyama bengakayiginyi, ulaka lukaJehova lwavutha phezu kwabantu, njalo wabatshaya ngokubehlisela umkhuhlane.

34 Ngakho indawo leyo yabizwa ngokuthi yiKhibhrothi Hathava, ngoba kulapho okwangcwatshwa khona abantu ababebukhali kokunye ukudla.

35 Ekusukeni kwabo eKhibhrothi Hathava abantu bahamba baze bayafika eHazerothi bahlala khona.